Azərbaycan Basketbol Liqasının 9-cu turunun əsas oyunlarından biri “Neftçi” ilə “Sərhədçi” arasında olub.
Mövsümə pis başlayan “Neftçi” sonradan uğurlu seriya yaxalayaraq ardıcıl 2 oyunda qalib gəlmişdi. Bu görüşdə də seriyanı davam etdirmək istəyən komanda oyuna fəal başlayıb. İlk periodda 19:12 hesabı ilə üstün olan nominal meydan sahibləri ikinci hissədə rəqibin ciddi müqaviməti ilə üzləşib. Bununla belə “Neftçi” böyük fasiləyə yenə üstün yollanıb. 3-cü hissəyə “Sərhədçi” fəal başlasa da, onlar yalnız hesab arasındakı fərqi azaltmağa nail olublar. 4-cü periodda 21:17 hesabı ilə rəqibindən üstün olan “Neftçi” oyunu da öz xeyrinə başa vurub 77:65. Hazırda “Neftçi” 11 xalla A qrupunda 5-ci yerdə gedir. “Sərhədçi” isə 13 xalla 3-cü yerdədir.