Paris Olimpiadasının 12-ci günündə kişi voleybolçuların yarışında yarımfinal mərhələsinə yekun vurulub.
Olimpiya çempionu - Fransa seçməsi mundialın qalibi - İtaliya yığmasını çətinlik çəkmədən məğlub edib - 3:0. Meydan sahiblərinin finaldakı rəqibi Polşa millisi olacaq. "Qırmızı-bəyazlar" 5 setin yekununda Amerika Birləşmiş Ştatları komandasından üstün olub. Kişi həndbolçuların mübarizəsində yarımfinalçılar müəyyənləşib. Almaniya kollektivi Tokio Olimpiadasının qalibi - Fransa seçməsi üzərində 35:34 hesabı ilə qələbə qazanıb. Danimarka yığması İsveç millisini məğlub edib. İspaniya komandası misirli həmkarları ilə görüşdə azarkeşlərini sevindirib – 29:28. Sloveniya həndbolçuları isə Norveç seçməsindən üstün olub. Qadın basketbolçuların yarışında 1/4 final mərhələsinə yekun vurulub. Amerika Birləşmiş Ştatları yığması Nigeriya millisini mübarizədən kənarlaşdırıb. Fransa komandası Almaniya kollektivinə şans verməyib. Yarımfinala yüksələnlər sırasında ispaniyalı həmkarlarına qalib gələn Belçika seçməsi və Serbiya basketbolçuları üzərində qələbə qazanan Avstraliya yığması da var. Atletikada isə qarışıq komandaların marafon yerişində mükafatçılar məlum olub. Alvaro Martin və Mariya Peresdən ibarət İspaniya millisi bütün rəqiblərini qabaqlayıb. Ekvador idmançıları ikinci nəticə göstəriblər. Avstraliya seçməsi isə üçüncülüklə kifayətlənib.