İngiltərə Premyer Liqasında 5-ci turun oyunları davam edir. Bu mövsüm inamlı təsir bağışlayan “Arsenal” doğma meydanda “Aston Villa”nı sınağa çəkib. 30-cu dəqiqədə meydan sahibləri hesabı açıblar. “Topçular”ın yeni transferi Qabriel Jezus fərqlənib. Lakin ruhdan düşməyən qonaqlar 74-cü dəqiqədə Duqlas Luizlə tarazlığı bərpa ediblər. Ancaq onların bundan artığına gücləri çatmayıb. 3 dəqiqədə sonra Arsenal Qabriel Martinellinin qolu ilə hesabda önə keçib. Bu, matçda vurulan sonuncu qol olub. Beləliklə Topçular yeni mövsümdə 5-ci matçda 5-ci qələbəni qazanıblar: “Arsenal” – “Aston Villa” 2:1.
Qeyri-sabit oyunu ilə diqqət çəkən “Liverpul” isə “Nyukasl”ı qəbul edib. Gərgin mübarizə şəraitində keçən qarşılaşmada hesabı “Nyukasl” futbolçuları açıblar. Qonaqların yeni transferi Aleksandr İsaak diqqət mərkəzinə düşüb. Çətin vəziyyətə düşən meydan sahibləri dönüş edə biliblər. Roberto Firmino Salahın ötürməsini lazımınca qiymətləndirib. Hamı matçın 1:1 hesabilə bitəcəyini gözlədiyi halda “Liverpul”un yeni transferi Fabio Karvalyo səhnəyə çıxıb. 2-ci hissəyə əlavə olunmuş 8-ci dəqiqədə fərqlənən portuqaliyalı futbolçu komandasına vacib 3 xal qazandrııb: “Liverpul” – “Nyukasl” 2:1.
Günün ən məhsuldar qarşılaşması isə Mançesterdə keçirilib. Burada “Mançester Siti” “Nottingem Forest”i qəbul edib. Rəqibini qol yağışına tutan meydan sahibləri hesabı 12-ci dəqiqədə açıblar. Yeni transfer Erlinq Haaland fərqlənib. Bir qədər sonra Haaland dubl edib. 38-ci dəqiqədə yenidən diqqət mərkəzinə düşən Haaland het-trik müəllifi olub. 50-ci dəqiqədə Joau Kanselu rəqibi növbəti dəfə mərkəzdən başlamağa məcbur edib. Bundan 10 dəqiqə sonra isə Xulian Alvarez 5-ci topu rəqib qapısından keçirib. 87-ci dəqiqədə Alvarez dubl etməklə son nöqtəni qoyub: “Mançester Siti” – “Nottingem Forest” 6:0.
“Vest Hem” – “Tottenhem” görüşündə isə azarkeşlər yalnız 2 qol görüblər. 34-cü dəqiqədə Tilo Kerer avtoqol müəllifi olub. Meydan sahibləri 55-ci dəqiqədə Tomaş Şouçekin qolu ilə hesaba tarazlıq gətiriblər. Qalan dəqiqələrdə isə başqa qol olmayıb: “Vest Hem” – “Tottenhem” 1:1
Turnir cədvəlinə 15 xalla “Arsenal başçılıq edir. Ondan 2 xal geri qalan “Mançester Siti” ikinci, hesabında 11 xal olan “Tottenhem” isə 3-cü pillədə qərarlaşıb.