Bu gün “Qarabağ” futbol klubunun baş məşqçisi Qurban Qurbanovun doğum günüdür.
Təcrübəli baş məşqçimiz 50 yaşını qeyd edir. Azərbaycan futboluna və azarkeşlərinə ilkləri bəxş edən Qurban Qurbanov futbol karyerası ərzində ölkəmizin “Energetik”, “Turan”, “Neftçi”, “İnter”, habelə Rusiyanın Stavropol “Dinamo”su, “Baltika”, “Fakel” və Gürcüstanın “Alazani” klublarında çıxış edib. 1992-2005-ci illər ərzində futbol üzrə milli komandanın tərkibində yer alan Qurban Qurbanov 1 il sonra karyerasını yekunlaşdıraraq baş məşqçi fəaliyyətinə start verib. Lakin illər keçməsinə baxmayaraq, Qurbanov hələ də, yığmamızın ən sərrast futbolçusudur. Dünyaya və Avropaya “Qarabağ” brendini layiqincə tanıdan yubilyar UEFA vayrağı altında keçirilən turnirlərdə komandasının uğurlarında əsas pay sahibi olub. Doğum günü münasibəti ilə Qurban Qurbanovu təbrik edir, gələcək karyerasında ona uğurlar arzulayırıq!