Akrobatika gimnastikası üzrə 12-ci Dünya yaş qrupları yarışlarının ikinci günündə kişi və qadın cütlüklər temp hərəkətləri, qarışıq cütlüklər və qadın qrupları balans hərəkətləri, kişi cütlüklər balans hərəkətləri, qarışıq cütlüklər temp hərəkətləri, kişi qrupları balans hərəkətləri üzrə bacarqıarını nümayiş etdiriblər.
Qarışıq cütlüklərin balans hərəkətləri üzrə proqramında ölkəmizi təmsil edən Milana Əliyeva və Nizam Xamidulin təsnifat mərhələsində 27.100 xal toplayıblar. Bununla da gimnastlarımız balans və temp hərəkətlərinin cəminə əsasən 54.100 xalla 4-cü pillədə qərarlaşıblar. Rəsul Seyidli və Rəvan Zeynallıdan ibarət kişi cütlüyü, Nəzrin Qasımova və Xanım Məmmədzadədən ibarət qadın cütlüyü temp hərəkətləri, Anahita Başiri, Zəhra Rəşidova, Nəzrin Zeyniyevadan ibarət qadın qrupu balans hərəkətlərində çıxış ediblər. Bu günkü yarışlarda isə 13-19 yaş kateqoriyasında təmsilçilərimizdən Leyla Bəşirova, Nəzrin Fərmanova, Mənsumə Məmmədzadədən ibarət qadın qrupu mübarizəyə qoşulacaqlar. Martın 6-dək davam edəcək yarışlarda 24 ölkədən 438 idmançı iştirak edir. Qeyd edək ki, turnir “İdman TV” vasitəsi ilə canlı yayımlanır.