Pekin Olimpiadasında 11-ci gün geridə qalıb.  9 medal dəsti uğrunda mübarizədə maraqlı nəticələr qeydə alınıb. Qadın snoubordçuların biq-eyr yarışında avstriyalı Anna Qasser 185,50 ballıq göstərici ilə çempion olub. Xatırladaq ki, 30 yaşlı idmançı 4 il əvvəl Pxençxan Olimpiadasında da eyni növdə rəqiblərini qabaqlamağı bacarmışdı.

Qadın fristaylçıların sloupstayl yarışında isə isveçrəli Matilda Qremo 86,56 bal toplayaraq karyerasında ilk dəfə olimpiya çempionu olub.   O, bir neçə gün əvvəl biq-eyr yarşında bürünc medala sahib çıxmışdı.

Daha bir isveçrəli idmançı Korinn Zuter də dağ  xizəkçilərinin sürətli eniş yarışında çempionluq sevinci yaşayıb. 27 yaşlı dünya çempionu  finiş xəttini 1 dəqiqə 31,87 saniyəyə qət edib. 

Kişi snoubordçuları biq-eyr yarışında 182,50 balla çinli Su İmin çempion olub. 17 yaşlı idmançı bir neçə gün əvvəl Pekində sloupstayl yarışında gümüş medal qazanmışdı.

 Olimpiada həvəskarlarının maraqla gözlədiyi kişilər arasınfa estafet yarışında gözlənildiyi kimi Norveç yığması uğur qazanıb. Skandinaviyalılar finiş xəttini 1 saat 19 dəqiqə 50 saniyəyə keçib. Xatırladaq ki, sonuncu dəfə kişilər arasında Norveç millisi 2010-cu ildə Vankuver Olimpiadasında bu kateqoriyada qızıl medal qazanmışdı.

Yeri gəlmişkən Norveçin kişilərdən ibarət konkisürmə millisi də günü qızıl medalla başa vurub. Qadın konkisürənlərin yarışında isə Kanada yığması  rəqiblərini qabaqlayaraq olimpiya çempionu olub.

Xizək ikinövçülüyündə 10 km məsafəyə qaçış yarışında norveçli Yorgen Qraabak 27 dəqiqə 13,3 saniyəlik nəticə ilə karyerasında 3-cü dəfə  olimpiya çempionu olub. 30 yaşlı idmançı 8 il əvvəl Soçi Olimpiadasında böyük tramplin və estafet yarışında da qızıl medalı boynundan asmışdı.

Kişi bobsleyçilərin cüt yarışında isə finiş xəttinin hər üç pilləsini almaniyalı idmançılar tutub.Qalib isə 3 dəqiqə 56,89 saniyəlik göstərici ilə Françesko Fridrix-Torsten Marqis dueti olub.

Yeri gəlmişkən, kişi hokkeyçilər arasında 1/4  final mərhələsində qarşılaşacaq komandalar müəyyənləşib. Təsnifat mərhələsində Danimarka Latviyanı 3:2, Slovakiya Almaniyanı 4:0, İsveçrə Çexiyanı 4:2, Kanada isə Çini 7:2 hesabıyla məğlub edib. 1/4  finalda ABŞ – Slovakiya, Rusiya – Danimarka, Finlandiya – İsveçrə və İsveç – Kanada oyunları keçiriləcək.