Pekin Qış Olimpiadasında 5-ci gün geridə qalıb. 6 medal dəsti uğrunda mübarizədə azarkeşlər növbəti dəfə maraqlı mübarizənin şahidi olub. Günə kişilər arasında fristayl yarışının biq-eyr növü ilə start verilib. 21 yaşlı norveçli idmançı Birk Ruus 187,75 balla karyerasında ilk dəfə Olimpiya çempionu olub. Amerikalı Kolbi Stivenson 2-ci, isveçli Henrik Harlaut 3-cü olub.
Qadın dağ xizəkçilərinin slalom yarışında isə slovakiyalı dünya çempionu Petra Vlqova 1 dəqiqə 44 saniyəlik göstərici ilə çempion olub. Avstriyalı Katarina Linsberger gümüş, isveçrəli Vendi Holdener bürünc medal qazanıb.
Qadınlar arasında snoubord kross yarşında amerikalı Lindsi Ceykobellis uğur qazanıb. Sonuncu dəfə 2006-cı ildə Turin Olimpiadasında məhz bu yarışda gümüş medal qazanan 5 qat dünya çempionunu fransalı Xloe Tröspeş izləyib. Kanadalı Merieta Odin bürünc medal qazanıb.
Kişilərin xizək ikinövçülüyü yarışında 25 dəqiqə 7 saniyəlik göstərici ilə almaniyalı Vinçents Qayqer çempion olub. Xatırladaq ki, 24 yaşlı idmançı 4 il əvvəl Pxençxan Olimpiadasında estafet yarışında olimpiya çempionu olmuşdu. Ondan 0,8 saniyə geri qalan norveçli Yorgen Qraabek fəxri kürsünün 2-ci, avstriyalı Lukas Qrayer 3-cü yerə çıxıb.
Kişilər arasında şort-trek yarışında cənubi koreyalı 4 qat dünya çempionu Te Xon Xvan 2 dəqiqə 9 saniyəlik göstərici ilə karyerasında ilk dəfə Olimpiadada qızıl medala sahib çıxıb. Kanadalı Stiven Dyubua 2-ci, rusiyalı Semyon Yelistratov 3-cü olub.
Kişi kirşəçilərin duet yarışında isə Almaniyanı təmsil edən Tobias Vendl Tobias Arlt cütü 1 dəqiqə 56 saniyəlik nəticə ilə olimpiya çempionu olub. Qeyd edək ki, bu, Vendlla Arltın karyeralarında Olimpya Oyunlarında hərəyə qazandıqları 5-ci qızıl medaldır. Onların həmyerliləri Toni Eggertlə Saşa Beneken gümüş, avstriyalı Tomas Ştoyla Lorents Koller bürünc mükafata sahib çıxıb.
Yeri gəlmişkən, Pekində kişilər arasında xokkey yarışı start götürüb. A qrupunda Rusiya millisi İsveçrə yığmasını 1:0 hesabı ilə məğlub edib. Çexiya komandasını 2:1 hesabıyla üstələyən Danimarka seçməsi isə günün sensasiyasına imza atıb.