Niderlandda futzal üzrə Avropa çempionatında qrup mərhələsinin 2-ci turu başlanıb.
A qrupunda Portuqaliya millisi növbəti qələbəsini əldə edib. Komanda yarışın ev sahibi Niderland yığmasına qalib gəlib. Avtoqol sayəsində hesabda önə keçən portuqaliyalılar daha sonra 3 qol vurublar. Meydan sahibləri isə yalnız bir dəfə fərqlənə biliblər. 4:1 hesablı qələbə qazanan Portuqaliya millisi 6 xalla qrupa başçılıq edir. Niderland seçməsinin aktivində 3 xal var.
Ukrayna kollektivi də eyni sayda xal toplayıb. İlk turda məğlub olan komanda bu dəfə Serbiya yığmasına asanlıqla qalib gəlib. Fasiləyə 4:0 hesablı üstünlüklə yollanan ukraynalılar 2-ci hissədə daha 2 qol vurublar. Serbiyalıların gücü isə yalnız buraxılan toplardan birinin əvəzini çıxmağa çatıb. Beləliklə Ukrayna millisi 6:1 hesablı qələbə qazanıb. Hər 2 görüşündə uduzaraq qrupun autsayderi olan Serbiya komandası son turda Niderland futzalçıları ilə üz-üzə gələcək. Lider Portuliya millisi isə Ukrayna kollektivi ilə qarşılaşacaq.