Prezident İlham Əliyev “Tokio-2020” Yay Paralimpiya Oyunlarında ölkəmizə növbəti qızıl medalları qazandıran idmançılarımızı təbrik edib. Dövlət başçısı bununla bağlı "Tvitter"dəki hesabında paylaşım edib. Paylaşımda deyilir: “Növbəti qızıl medal sevincini bizə bəxş etdikləri üçün Dürsədəf Kərimovaya, rekordçularımız Həmid Heydəri və Elvin Astanova təşəkkür edir, onları qələbələri münasibətilə ürəkdən təbrik edirəm!”. Prezident İlham Əliyev oyunlarda yüksək nəticə göstərən komandamızın üzvləri - İlham Zəkiyev, Namiq Abbaslı və Pərvin Məmmədovu da səmimi qəlbdən təbrik edib.
Azərbaycanın Birinci vitse-prezidenti Mehriban Əliyeva da “İnstaqram” səhifəsində Yay Paralimpiya Oyunlarında növbəti medallar qazanan idmançılarımızı təbrik edib. Paylaşımda deyilir: “Bizim yeni qələbələrimiz, növbəti medallarımız! İdmançılarımızı – qızıl medal sahibləri, dünya rekordunu yeniləmiş Elvin Astanovu, Dürsədəf Kərimovanı və bürünc medal qazanmış İlham Zəkiyevi səmimi qəlbdən təbrik edirəm. Sizin hamınıza və milli paralimpiya yığmamızın digər üzvlərinə möhkəm cansağlığı, yeni nailiyyətlər arzulayıram”.