Avropa çempionu Portuqaliya seçməsi builki qitə yarışında da qələbəyə əsas namizədlərdəndir. Titulunu qorumaq niyyətində olan komanda zəngin heyəti ilə seçilir. Baş məşqçi Fernandu Santuş jurnalistlər önünə çıxaraq Avropa çempionatında çıxış edəcək futbolçuların adlarını açıqlayıb.Hücum xəttində “Sportinq”də ölkə çempionu olan Pedru Qonsalveş, “Ayntraxt”ın heyətində bundesliqada ən çox top vuran Andre Silva, “Mançester Siti”nin premyer liqanın qalibi olmasında böyük rol oynayan Bernardu Silva, “Yuventus”da 100 qol həddini keçən, İtaliyada ilk dəfə ölkə kubokuna yiyələnən Kriştianu Ronaldu, “Liverpul”da bir çox matçda effektli çıxışı ilə seçilən Dioqu Jotanı görürük. Bundan başqa “Valensiya”nın vacib üzvlərindən Qonsalu Quedeş, “Atletiko”nun heyətində çempionluq mübarizəsində iştirak edən Joau Feliks, “Benfika”dan Rafa Silva da komandaya cəlb olunub.
Yarımmüdafiədə Danilu Pereyra, Joau Palyinya, Ruben Neveş, Brunu Fernandeş, Joau Moutinyu, Renatu Sanşeş, Serjiu Oliveryra, Vilyam Karvalyu kimi futbolçuların adları var.
Müdafiəçi qismində Joau Kanselu, Nelson Semedu, Joze Fonte, Pepe, Ruben Diaş, Nunu Mendeş, Rafael Gereyru heyətə çağırılıb.
Nəhayət qapıçılar: Antoni Lopeş, Ruy Patrisiu və Ruy Silva.
Sonda xatırladaq ki, Portuqaliya futbolçuları Avropa çempionatında ölüm qrupu hesab olunan F qrupunda dünya çempionu Fransa, iddialı Almaniya və ötən yarışın sürpriz komandası Macarıstan futbolçuları ilə mübarizə aparacaq.