Fransa çempionatında 9-cu tur başa çatıb. “Monako” “Bordo”nu qəbul edib. Görüş meydan sahiblərinin üstünlüyü ilə keçib. Ardıcıl 3 oyun xal itirən “Monako” bu dəfə azarkeşlərini sevindirib. Meydan sahiblərindən Vissam Ben Yedder və Jelson Martinş hərəyə bir dəfə fərqləndiyi halda, Kevin Volland dubl edib. 4 cavabsız qolla qalib gələn “Monako” 14 xalla 8-cidir.
Digər oyunda turnirin iddialıları üz-üzə gəlib.Söhbət “Lill” – “Lion” matçından gedir. Oyuna meydan sahibləri daha yaxşı başlayıblar. 21-ci dəqiqədə Conatan Bamba hesabı açıb. Fasiləyədək qonaqlar tarazlığı bərpa edə biliblər. “Lill”dən Zeki Çelik avtoqol müəllifi olub. Qalan vatxda hesab dəyişməyib. Xallarının sayını 19-a çatdıran “Lill” lider PSJ-dən 2 xal geri qalır. “Lion” isə 14 xalla 6-cıdır.