Böyük dəbilqə seriyasından “US Open” yarışında 2-ci mərhələ keçirilir. Kişi tennisçilərin mübarizəsində favoritlərdən Novak Cokoviç böyük britaniyalı Kayl Edmunda qalib gəlib.Ümumi hesab 3:1 serbiyalı raketka ustasının xeyrinə olub. Serbiyalı tennisçi 3-cü mərhələdə almaniyalı Yan Lennard Ştrufla görüşəcək.İddialılardan Stefanos Sitsipas daha inamlı qələbə qazanıb. O, yerli idmançı Maksim Kressini 3 setdə məğlub edib. Yunanıstanlı raketka ustası növbəti mərhələdə xorvatiyalı Borna Çoriçlə qarşılaşacaq. Belçikalı David Qoffen də etimadı doğruldub. O, cənubi afrikalı Lloyd Harrislə oyunda 4 setdə qələbəni təmin edərək 1/16 finalda serbiyalı Filip Krayinoviçin rəqibi olub.
Qadınların turnirinə gəlincə, ali mükafatı qazanmağa əsas namizədlərdən hesab olunan çexiyalı Karolina Plişkova gözlənilmədən uduzub. Fransalı Karolin Qarsiya güclü rəqibindən 2 setdə üstün olub. O, növbəti mərhələdə amerikalı Cennifer Breydi ilə görüşəcək. Plişkovanın həmvətəni Petra Kvitova isə 3-cü mərhələyə vəsiqə qazana bilib. O, ukraynalı Katerina Kozlovanı 2 setin yekununa əsasən məğlub edərək 1/16 finala adlayıb. Kvitovanın burada rəqibi yerli idmançı Cessika Pequladır. Yaponiyalı Naomi Osaka da italiyalı Kamila Corcini çətinlik çəkmədən, 2 setdə məğlub edib. Osaka 1/16 finalda ukraynalı Marta Kostyukla görüşəcək.