Bu gün UEFA Çempionlar Liqasında 4-cü tura start veriləcək. İlk oyun günündə ən diqqət çəkən qarşılaşma Madriddə olacaq.
İspaniya paytaxtında turnirin ən titullu komandaları “Real” Madrid və “Milan” üz-üzə gələcək. Turnirin hazırki qalibi olan və 15 dəfə fəxri mükafata yiyələnərək rekord müəyyənləşdirən Kral Klubuna titul baxımdan ən yaxın komanda məhz “Milan”dır. İtaliya komandası 7 titulla bu göstəricədə yalnız Madrid təmsilçisindən geri qalır. Sonuncu dəfə 17 il əvvəl, 2007-ci ildə bu turnirdə çempion olmasına baxmayaraq, Milan 2-ci pillədəki mövqeyini hələ də qoruyur. Daha bir maraqlı məqam isə 17 il əvvəl İtaliya klubuna uğur qazandıran, ümumiyyətlə bu turnirdə “Milan”la həm futbolçu, həm də baş məşqçi kimi 2 dəfə çempion olan Karlo Ançelottinin hazırda “Real Madrid”ə rəhbərlik etməsidir. Statistikaya nəzər salsaq burda da daha bir maraqlı məqam diqqət çəkir. Belə ki, bu komandalar Çempionlar Liqasında indiyə kimi 15 dəfə üz-üzə gəliblər ki, şəxsi rəqabətdə bərabərlik var. Tərəflər bu görüşlərdə hərəyə 6 qələbə qazanıblar, 3matç isə heç-heçə bitib. Əlavə edək ki, bu qarşılaşmaya hər iki komanda itkilərlə çıxacaq. Realın heyətində David Alaba, Tibo Kurtua və dani Karvaxal, Milanda isə Luka Yoviç, Alessandro Florentsi, İsmael Bannaser və Mattia Qabbia zədəlidir. Günün digər oyunlarına gəldikdə, 3 turdan sonra “Aston Villa” ilə bərabər maksimum nəticə göstərən “Liverpul” doğma arenada “Bayer Leverkuzen”lə qarşılaşcaq. Bu matç  maraqlı edən məqamlardan biri də futbolçu kimi vaxtilə mersisaydləıların heyətində çıxış edən və hazırda Levekuzen təmsilçisi ilə tarixi uğurlar qazanan Xabi Alonsodur. Portuqaliya çempionatında rəqib tanımayan 10 turun hamısında qalib gələn “Sportinq” doğma arenada “Mançester Siti” ilə üz-üzə gələcək. Şəhərlilərin bu oyun öncəsi son 2 görüşdə uduzması diqqət çəkir. İngiltərə Liqa kubokunda “Tottenhem”ə məğlub olan Pep Qvardiolanın komandası premyer liqada da “Bornmut”a boyun əydi. Qeyd edək ki, “Lill” – “Yuventus”, “Bolonya” – “Monako”, “Seltik” – “Leypsiq” və “Borussiya” Dortmund” – “Şturm” Qraz görüşləri də Bakı vaxtı ilə gecə yarısı start götürəcək.