Paris Olimpiadasının 10-cu günündə kişi voleybolçuların yarışında 1/4 final mərhələsinə yekun vurulub.
Polşa seçməsi Sloveniya yığmasını məğlub edib - 3:1. "Qırmızı-bəyazlar"ın yarımfinaldakı rəqibi Braziliya millisinə eyni hesabla qalib gələn Amerika Birləşmiş Ştatları komandası olub. İlk iki hissədən sonra geri düşməsinə baxmayaraq, dönüş edən İtaliya kollektivi Yaponiya voleybolçuları üzərində qələbə qazanıb. Olimpiya çempionu - Fransa seçməsi isə bənzər formada Almaniya yığmasından üstün olub - 3:2.
Üçə-üç basketbolda mübarizəyə yekun vurulub. Kişilərin turnirində finalda Fransa millisini 18:17 hesabı ilə məğlub edən Niderland komandası çempion olub. Qadınların yarışında da qalib 1 xal fərqi ilə müəyyənləşib. Həlledici görüşdə İspaniya kollektivinə qalib gələn Almaniya basketbolçuları fəxri kürsünün ən yüksək pilləsinə qalxıblar.
Triatlon üzrə qarışıq komandaların mübarizəsində də Almaniya seçməsi qızıl medal qazanıb. Amerika Birləşmiş Ştatları yığması təkcə Bundestimdən geri qalıb. İlk üçlüyü isə böyük britaniyalı triatletlər tamamlayıb.