Paris Olimpiadasının 10-cu günündə atletika üzrə daha 4 növdə qaliblər müəyyənləşib. Kişilərin şüvüllə hündürlüyə tullanma yarışında Arman Düplantis 6,25mgöstərici ilə özünə aid dünya rekordunu yeniləyib. Beləliklə, isveçli idmançı ikinci dəfə Yay Olimpiya Oyunlarının qalibi olub. Amerika Birləşmiş Ştatları təmsilçisi - Sem Kendriks təkcə Düplantisdən geri qalıb. İlk üçlüyü isə yunanıstanlı Emmanuil Karalis tamamlayıb.
800m məsafəyə qaçış üzrə qadınların mübarizəsində britaniyalı Kili Hockinson bütün rəqiblərini qabaqlayıb. Efiopiyalı atlet - Siqe Duquma ikinci, keniyalı Meri Moraa isə üçüncü nəticə göstərib.
5 min m məsafəyə qadınların qaçışında Keniya idmançıları ön plana çıxıb. Beatris Çebet finişə birinci çatıb. Onun həmvətəni - Feyt Kipyeqon gümüş medalçı olub. Niderlandı təmsil edən Sifan Hassan isə üçüncülüklə kifayətlənib. Qeyd edək ki, yarış yekunlaşandan sonra Kipyeqonun nəticəsi ləğv olunub. Səbəb kimi isə idmançının qaçarkən efiopiyalı Qudaf Tsedaya mane olması göstərilib. Lakin Kenya nümayəndə heyətinin apelyasiya şikayətinə baxılarkən Kipyeqonun rəqibinə maneə törətmədiyi aşkarlanıb. Beləcə onun gümüş mükafatı qaytarılıb. Efiopiyalı Qudaf Tseday isə yarışı 9-cu sırada tamamlayıb.
Qadınların diskatma yarışında ABŞ idmançısı - Valari Ollman Tokio Olimpiadasındakı uğurunu təkrarlayaraq qalib olub. Çinli Fen Bin ikinci yeri tutub. Xorvatiyalı Sandra Elkaseviç isə ilk üçlüyü tamamlayıb.
Paris-2024-ün 10-cü günündə gimnastika üzrə də 4 növdə mükafatçıların adlarına aydınlıq gəlib. Paralel qollar üzrə kişilərin yarışında çinli Szou Szinyuan ardıcıl ikinci dəfə Olimpiya çempionu olub. Ukraynalı İlya Kovtun ikinci, yapon Sinnosuke Oka isə üçüncü nəticə göstərib. Bununla yanaşı, o, turnik hərəkətlərində bütün rəqiblərini qabaqlayaraq qızıl medal qazanıb. Kolumbiyalı Anxel Baraxas təkcə çempiondan geri qalıb. Eyni nəticə göstərən Taypey idmançısı - Tan Çia-hun və Çin təmsilçisi - Can Bohen üçüncü olublar.
Qadınların döşəmə üzərində sərbəst hərəkətlər proqramında braziliyalı Rebekka Andrade qalib olub. ABŞ gimnastları - Simon Baylz və Cordan Çaylz müvafiq olaraq ikinci və üçüncü yerləri tutublar.
Gimnastika tiri üzrə qadınların yarışında isə italiyalı Aliçe Damato uğur qazanıb. Çin idmançısı - Çjou Yatsin gümüş medalçı olub. Aliçenin həmvətəni - Manila Espozito üçüncülüklə kifayətlənib.