Andorrada 16 yaşadək qız basketbolçuların Avropa çempionatında C divizionu üzrə mübarizəyə yekun vurulub.
Finalda seçməmiz təşkilatçı ölkənin komandası ilə üz-üzə gəlib. Basketbolçularımız fasiləyə 11 xallıq üstünlüklə yollanıblar. Andorralılar digər hissələrdə də məğlubiyyətdən xilas ola bilməyiblər. Beləliklə Azərbaycan komandası 57:45 hesabilə qələbə qazanaraq Avropa çempionu olub. Bununla qızlarımız tarixi nəticə göstəriblər. İndiyədək qadın basketbolçulardan ibarət heç bir komandamız milli səviyyəsində belə böyük nailiyyət əldə etməmişdi. Üstəlik seçməmiz yarışı məğlubiyyətsiz tamamlayıb. Qızlardan ibarət kollektivimiz qrup mərhələsində Andorra, Moldova, Albaniya komandalarına, yarımfinalda isə Gürcüstan idmançılarına qalib gəlmişdi.