Şərq konfransının ön pillələrində gedən “Miluoki Baks” səfərdə “Çikaqo Bulz”la qarşılaşıb. Böyük fasiləyə qonaqlar 61:49 hesabilə öndə yollanıblar. Növbəti dövrələrdə Çikaqo basketbolçuları təşəbbüsə yiyələnsə də bu, qələbə üçün yetərli olmayıb: Çikaqo – Miluoki 100:112. 12 oyundur qalib gələn “Miluoki Baks” Şərq konfransında 2-cidir. Bu mövsüm zəif təsir bağışlayan “Çikaqo Bulz” isə 11-ci pillədə gedir.
Minnesota Timbervulfs azarkeşləri önündə “Vaşinqton Vizards”la üz-üzə gəlib. İlk dövrdə meyda sahibləri üstün olsa da sonradan fəallaşan paytaxt klubu yekunda 114:106 hesabilə qələbə qazanıb. “Minnesota” klubu Qərb konfransında 8-ci, “Vaşinqton Vizards” isə Şərq zonasında 9-cu sırada qərarlaşıb.
“Finiks Sans” və “Los Anceles Klippers” komandalarının dueli prinsipiallığı ilə diqqət çəkib. Görüş böyük fasiləyə qədər bərabər mübarizə şəraitində keçsə də növbəti dövrələrdə qonaq komanda üstün olub: Finiks Sans – Los Anceles 107:116.
Qeyd edək ki, Şərq konfransında “Boston Seltiks”, Qərb konfransında isə “Denver Naqqets” liderdir.