Gənclər və İdman Nazirliyi 2022-ci ilin idman yekunlarına həsr olunmuş qala mərasim keçirib. Tədbirdə idman təşkilatlarının, federasiyaların, media qurumlarının rəhbərləri və nümayəndələri, idmançılar, məşqçilər, habelə idman ictimaiyyətinin tanınmış simaları iştirak ediblər. Əvvəlcə Gənclər və idman naziri Fərid Qayıbov çıxış edərək 2022-ci ilin Azərbaycan idmanı üçün uğurlu keçdiyini bildirib və bu münasibətlə idman ictimaiyyətini təbrik edib. Qonaqları qarşıdan gələn yeni il və Dünya Azərbaycanlılarının Həmrəyliyi Günü münasibətilə təbrik edən nazir 2023-cü ilin ölkə idmanı üçün daha da uğurlu olacağına inandığını söyləyib. Daha sonra üç mərhələli sorğu əsasında müxtəlif nominasiyalar üzrə müəyyənləşdirilmiş qaliblərə mükafatlar təqdim olunub. İlin ən yaxşı qadın idmançısı nominasiyasında  Anna Başta, Gövhər Beydullayeva və Zöhrə Ağamirova fəxri kürsüyə qalxıb. Ən yaxşı kişi idmançı nominasiyasında Eldəniz Əzizli, Abdulla Qədimbəyli və Hidayət Heydərov təltif olunublar. İlin ən yaxşı qadın komandası nominasiyasında bədii gimnastikada qrup hərəkətləri kollektivi, voleybol üzrə seçmə və qılıncoynatma üzrə milli mükafata layiq görülüb.  İlin ən yaxşı kişi komandası nominasiyasında isə “Qarabağ” futbol klubu, minifutbol üzrə milli, habelə basketbol 3x3 yığması fərqlənib. İlin ən yaxşı məşqçisi nominasiyasında Qurban Qurbanov, Aleksandr Tarakanov  və Siyana Vasileva mükafatlandırılıblar. İlin idman federasiyası nominasiyasında cüdo, gimnastika və güləş federasiyaları təltif olunub. İlin idman klubu isə “Qarabağ” futbol klubu seçilib. Komandaya rəhbərlik edən Qurban Qurbanov həmçinin ədalətli oyunlar nominasiyasında da birinci yerə layiq görülüb. 2022-ci ilin idman tədbirləri sırasında Suqovuşan-Mİngəçevirdə keçirilən “Prezident kuboku” reqatası, Şəkidə “İdman Festivalı 2022” və yunan-Roma güləşi üzrə dünya kuboku turnirləri fəxri mükafata sahib olub.  İlin ən fəal idman jurnalisti nominasiyasında Gəray Qiyasov, Sənan Şəfizadə və Zəki Feyzullayev fəxri kürsüyə qalxıblar. 2022-ci ilin hakimi Əliyar Ağayev, idman tibb personalı Aydın Ağaliyev, idman kəşfi Gövhər Beydullayeva, ilin fotoqrafı Dilavər Nəcəfov, ilin idman qurğusu Su İdmanı Sarayı, habelə ilin uşaq-gənclər idman məktəbi 1 saylı Sumqayıt uşaq-gənclər idman şahmat məktəbi, olimpiya kompleksi Göygöl olimpiya idman kompleksi, ilin idman filmi isə “Uğurlar – Elçin Əsədov” mükafata sahib olub.   Nəhayət 2022-ci ilin idman media qurumları arasında “İdman TV” də mükafata layiq görülüb. Sonda isə Azərbaycan idmançılarının reytinq cədvəlində 2022-ci ili ilk onluqda başa vuran atletlər mükafatlandırılıblar.