UEFA Avropa Liqasının 5-ci turunda "Qarabağ" - "Olimpik Lion”u qəbul edəcək.
Bu, komandamızın Fransa təmsilçilərinə qarşı 11-ci oyunu olacaq. Daha əvvəlkli matçlarda “Qarabağ” 1 qələbə qazanıb və 3 dəfə heç-heçə edib.  Altı qarşılaşmada məğlubiyyətlə üzləşib. Rəqib qapısına 7 qol vuran futbolçularımız 20 top buraxıblar. Hazırda Ağdam klubunun hesabında 3 xal var. Komandamız bu görüşdə qalib gələcəyi təqdirdə pley-of imkanlarını artıracaq. Oyundan əvvəl komandamızın baş məşqçisi Qurban Quranov media önünə çıxıb:  “"Vacib oyundur, pis hazırlaşmamışıq. Çox istəyirik ki, azarkeşlərimizi sevindirək və uğurlu çıxış edək. Rəqibin heyətinə baxmışıq. Özümüzlə bağlı müəyyən sual doğuran məsələlər var. Böhran oldu-olmadı, istənilən komandaya qarşı hazırlaşırıq. Bu cür klubların maliyyə böhranının yoluna qoyulmasında problem görmürəm. Böyük klublarda da böhran olur. Məncə, belə fikirlərdən uzaq olmaq lazımdır".
Rəqib "Olimpik Lion" un hesabında 7 xal var. Fransa klubu son 2 oyununda qələbə qazana bilməyib. Azarkeşləri önündə “Beşiktaş”a məğlub olan komanda “Hoffenhaym” səfərində məhsuldar heç-heçə edib. "Lion"un baş məşqçisi Pyer Saj bu oyunda qalib gələcəklərinə inandığını bildirib: “Onlar çox yaxşı nəticə göstərməyə qadir komandadır. Rəqibin sürətli və təhlükəli futbolçuları var. Ona görə də bu komandaya yuxarıdan aşağı baxmaq olmaz. Biz əsasən onların Avropa kuboklarındakı matçlarını analiz etmişik. Xüsusən, Benzia çox yaxşı formadadır. Ancaq biz "Qarabağ" komandasının digər keyfiyyətli oyunçuları üzərində də oyunumuzu qurmağa çalışacağıq”.
Qeyd edək ki, “Qarabağ” – “Olimpik Lion” matçı bu gün saat 21.45-də başlanacaq. Oyunu Nenad Minakoviçin rəhbərlik etdiyi serbiyalı hakimlər briqadası idarə edəcək.