Bu gün Uefa Çempionlar Liqasında 5-ci tura start verilir. Diqqət çəkən görüşlərdən biri “Alianz Arena”da keçiriləcək “Bayern Münxen”  - PSJ ilə üz-üzə gələcək. Münxen klubunun hesabında 6 xal var. Fransa təmsilçisi isə 2 xal geri qalır. “Bayern”in heyətində əsas itki Aleksandr Pavloviç və Joao Palinyanın adı ilə bağlıdır. Oyundan əvvəl baş məşqçilər media nümayəndələrinin önünə çıxıblar. “Bayern”in çalışdırıcısı Vensan Kompani çətin sınaq qarşısında olduqlarını bildirib: “PSJ Avropanın ən güclü klublarından biridir. Top onlarda olduğu zaman hücum fazasında qarşısıalınmaz olurlar. Həmçinin komanda güclü pressinq qabiliyyətinə sahibdir. Çempionatda tanımadığımız bir çox klub var. Hər kəsin məqsədi liqa mərhələsini ilk 8-likdə başa vurmaqdır. Bizim əsas hədəfimiz isə birinci olmaqdır. Bunun üçün də çox çalışmalıyıq. Aleks hələ ki məşqlərdə iştirak etmir. Onun komandaya qoşulmağı bir qədər vaxt alacaq”.
3 oyundur qalib gələ bilməyən “Pari Sen Jermen” meydanda optimal heyətlə mübarizə aparacaq. Təcrübəli çalışdırıcı Luis Enrike uğurlu nəticə əldə etmək üçün lazım gəlsə risk edəcəklərini vurğulayıb: “Bu mövsüm Çempionlar Liqasında işlərimiz heç də yaxşı getmir. Xüsusən də öz meydanımızda istədiyimiz nəticəni qazana bilmədik. Bu çətinliyin səbəbkarı elə özümüzük. Qalib gəlmək üçün qol vurmalısan. Meydana bu zehniyyətlə çıxmalı, cəsur olmalı və risk etməkdən çəkinməməliyik. Hər iki komanda demək olar eyni səviyyəli oyun üslubuna malikdir. Meydanda nəyə qadir olduğumuzu göstərməliyik. Bəlkə də “Bayern”lə matç bizim üçün dönüş nöqtəsi olacaq.
Qeyd edək ki, “Bayern” – PSJ matçı bu gün gecə yarısı başlanacaq. Oyunu rumıniyalı hakim İştvan Kovaç idarə edəcək.