Almaniya kuboku uğrunda yarışın yarımfinal mərhələsində Bundesliqada çıxış edən “Frayburq” səfərdə “Hamburq”la üz-üzə gəlib.
İlk dəqiqələrdən təşəbbüsü ələ alan qonaqlar matçın taleyini elə ilk hissədə həll ediblər. 11-ci dəqiqədə Nils Petersen hesabı açıb. Çox keçmədən Nikolas Hefler fərqi iki topa yüksəldib. İlk yarının ortalarında isə Vinçentso Qrifo penaltini dəqiq yerinə yetirərək “Hamburq”un bütün ümidlərini puç edib. Lakin fasilədən sonra toparlanmağı bacaran meydan sahibləri buraxılan toplardan birinin əvəzini çıxıblar. Robert Qlattsel fərqlənsə də, bu komandanın məğlub olmasına mane olmayıb: “Hamburq” – “Frayburq” 1:3.
Bununla da, “Frayburq” Almaniya kubokunda finala adlayan ilk komanda olub. Qeyd edək ki, komanda tarixində ilk dəfə kubok yarışının həlledici mərhələsinə vəsiqə əldə edir.