Avropa liqasında 1/4 final mərhələsində “Ayntraxt” Frankfurt “Barselona”nı qəbul edəcək. Kataloniya klubunun heyətində itkilər nəzərə çarpır. Kataloniyalılar Dani Alveş, Memfis Depay Ansu Fati, Serji Roberto, Lyuk de Yonq və Samuel Umtitinin köməyindən yararlana bilməyəcəklər. Frankfurt klubunun baş məşqçisi Oliver Qlazner komandasının qələbə imkanlarını dəyərləndirib: “Bu mövsüm Avropa liqasında uğurla çıxış edirik. “Barselona” ilə matçda da bu seriyanı davam etdirmək istəyirik. İlk oyunda sərfəli nəticə əldə etməyə çalışacağıq. Bunun üçün fürsətləri qaçırmamalıyıq. Rəqibin gücü və adı bizi qorxutmamalıdır. Soyuqqanlı olmalı və davamlı pressinq etməliyik .Yalnız bu halda istədiyimiz nəticəni qazana bilərik”.
"Barselona"nın uğurları üçün çalışan Xavi Hernandes ehtiyyatlı danışıb: “1/4 finalda zəif rəqib ola bilməz. Futbolçular oyuna ciddi hazırlaşıblar. Komanda olaraq rahatlaşsaq, bunun nəticəsi bizim üçün ağır ola bilər. İspaniyada "Ayntraxt" çox məşhur deyil. Bu, məyusedici haldır. Onlar fiziki cəhətdən çox güclüdürlər. Qələbə qazanmaq böyük üstünlük olardı. İstənilən halda öz oyunumuza sadiq qalacağıq".
Qeyd edık ki, “Ayntraxt” - "Barselona" matçı bu gün Bakı vaxtilə saat 23:00-da başlanacaq.