La Liqanın 25-ci turunda “Sevilya” səfərdə “Espanyol”un qonağı olub. Görüş 1:1 hesabı ilə yekunlaşıb. “Sevilya”nın heyətində Rafa Mir, meydan sahiblərində isə Serxi Darder fərqləniblər. Son 5 oyununda 4-cü dəfə heç-heçə edən “Sevilya” lider “Real”dan 6 xal geri düşüb.
Günün mərkəzi qarşılaşmasında “Barselona” Valensiyada şəhərin eyni adlı komandasını böyükhesabla məğlub edib. Qonaqlar fasiləyə kimi 3 qol vurublar. Pyer-Emerik Obameyanq dubl edib. Frenki de Yonq isə 1 dəfə fərqlənib. Qeyd edək ki, qiş transfer pəncərəsində “Arsenal”dan “Barselona”ya keçən Obameyanq yeni komandasında ilk dəfə rəqib qapısına yol tapıb. Fasilədən sonra Karlos Soler yerli azarkeşləri ümidləndirsə də, Pedri son nöqtəni qoyub - 4:1. Bu qələbə sayəsində “Barselona” 42 xalla turnir cədvəlində 4-cü pilləyə yüksəlib. “Atletiko” da eyni sayda xal toplasa da, “Barsa” daha yaxşı top fərqinə görə rəqibini qabaqlayıb.