İspaniya kuboku uğrunda mübarizənin 1/16 final mərhələsində “Barselona” səfərdə “Linares” ilə üz-üzə gəlib. Kataloniyalıların favorit hesab olunduğu matçda hesabı gözlənilmədən meydan sahibləri açıblar. Fransisko Karniserin ötürməsindən sonra Uqo Dias topu başla qapıdan keçirib. İkinci hissəyə daha üstün başlayan Xavi Ernandesin komandası məğlubiyyətdən yaxa qurtarıb. 63-cü dəqiqədə Usman Dembele hesabı bərabərləşdirib. 6 dəqiqə sonra isə Ferran Xutqla komandasını 1/8 final mərhələsinə yüksəldən qolun müəllifi olub. “Linares” – “Barselona” 1:2.
La Liqanın digər favoriti “Real” Madrid də səfərdə uğur qazanıb. “Alkoyano” ilə qarşılaşan “Kral” klubu yarım saat ərzində rəqibin təhlükəli hücumlarına məruz qalıb. Lakin hesabı məhz Karlo Ançelottinin komandası açıb. 39-cu dəqiqədə Rodriqonun küncdən ötürdüyü topu Eder Militao qapıya vurub. Fasilədən sonra “Alkoyano” futbolçuları hesabı bərabərləşdiriblər. Dani Veqa Andrey Luninin qoruduğu qapıya yol tapıb. 10 dəqiqə sonra meydana ikinci hissədə daxil olan Marko Asensio fərq yaradıb. Az sonra İsko mübarizəyə nöqtə qoyub. “Alkoyano” – “Real” Madrid 1:3.