Futzal üzrə Azərbaycan çempionu “Araz” (Naxçıvan) bu gün UEFA Çempionlar Liqasının əsas mərhələsində mübarizəyə başlayacaq.
B yolunda yer alan Joze Alesio Da Silvanın baş məşqçi olduğu kollektiv 6-cı qrupdakı ilk sınağında Ukraynanın “Uraqan” komandası ilə üz-üzə gələcək. İvano-Frankivski şəhərindəki Peşəkar Bədən Tərbiyə Kollecinin zalında keçiriləcək qarşılaşmaya Bakı vaxtı ilə saat 20:00-da start veriləcək.
Oyun öncəsi Azərbaycan çempionunun heyətində 3 itki var. Rizvan Fərzəliyev və İsaq Suğal zədə, Xətai Bağırov cəza səbəbindən oynamayacaq. Zədəsini yenicə sağaltmış Ramiz Çovdarovun isə meydana çıxıb-çıxmayacağı sual altındadır.
6-cı qrupun oyunları Ukraynada keçirilir. Bu qrupun digər görüşündə Kosovonun "Ligeni" və Rumıniyanın "Yunayted Qalati" kollektivləri qarşılaşacaqlar. Həmin oyun Bakı vaxtı ilə saat 15:00-da start götürəcək.
UEFA Çempionlar Liqası
6-cı qrup
28 oktyabr
20:00. Uraqan (Ukrayna) – Araz (Naxçıvan, Azərbaycan)
Baş hakim: Yosip Barton (Şimali Makedoniya).
İvano-Frankivski. Peşəkar Bədən Tərbiyə Kollecinin zalı.