Çempionlar Liqasının D qrupunda Kiyevdə keçirilən “Şaxtyor” – “İnter” qarşılaşmasında qapılara top vurulmayıb. Qeyd edək ki, “İnter” Çempionlar Liqasında son 9 oyunda cəmi 1 qələbə qazana bilib. Xatırladaq ki, “Şaxtyor” və “İnter”in ötən mövsüm qrup mərhələsindəki hər iki oyununda da hesab açılmamışdı.
“Real Madrid” isə “Santyaqo Bernabeu”da “Şerif”i qəbul edib. İlk turda doğma meydanda “Şaxtyor”u məğlub etməklə qrup mərhələsinə qələbə ilə start verən debütant bu dəfə də sensasiya edib. Görüşdə hesabı məhz Moldova çempionu açıb. Cəsur Yaxşıbayev fərqlənib. “Real” futbolçuları fasilədən sonra tarazlığı bərpa ediblər. Kərim Benzema penaltidən yararlanıb. Amma oyunun sonunda Sebastien Tilli “Şerif”ə tarixi qələbə qazandırıb.
Hazırda debütant 6 xalla qrupa başçılıq edir. “Real” 3 xalla 2-cidir. “İnter” və “Şaxtyor”un aktivində 1 xal var. Növbəti turda “İnter” “Şerif”i, “Şaxtyor” isə “Real”ı qəbul edəcək.