İspaniya La Liqasında 4-cü turun oyunları keçirilir.
“Valensiya” səfərdə “Osasuna”nın qonağı olub. Görüşdə ilk qolu meydan sahibləri vurublar. Artıq 8-ci dəqiqədə Xon Monkayola fərqlənib. Amma fasiləyə kimi qonaqlar tarazlığı bərpa ediblər. Maksimiliano Qomez hesabı bərabərləşdirib. 2-ci hissədə isə valensiya futbolçuları təşəbbüsü ələ alıblar. Fasilədən sonra Aridan Ernandesin avtoqolu qonaq komandanı hesabda önə keçirib. 5 dəqiqədən sonra Qonsalu Quedeş üstünlüyü 2 topa yüksəldib. Görüşdə son nöqtəni Omar Alderete qoyub. Beləliklə Valensiya səfərdə 4:1 hesabı ilə qalib gəlib.
Hazırki çempion “Atletiko” Barselonadan əzmkar qələbə ilə qayıdıb. “Espanyol”un qonağı olan paytaxt klubu fasilə ərəfəsində qapısından top buraxıb. Raul de Tomas diqqət mərkəzinə düşüb. Amma 2-ci hissədə qonaqlar hesabı xeyirlərinə dəyişə biliblər. Əvvəlcə 79-cu dəqiqədə Yannik Karrasko tarazlığı bərpa edib. 2-ci hissəyə artırılmış 9-cu dəqiqədə isə Toma Lemar “Atletiko”nun qələbə qolunu vurub.
Madridin digər komandası “Real” da azarkeşlərini sevindirib. “Kral klubu” yenidənqurulan “Santyaqo Bernabeu” areansında ilk görüşünə çıxıb. Paytaxt təmsilçisi “Selta”nı qəbul edib. 560 gündən sonra bu stadionda oyun keçirən “Real” futbolçuları bunu qələbə ilə qeyd ediblər. Hərçənd ki, görüş meydan sahibləri üçün yaxşı başlamayıb. Artıq 4-ci dəqiqədə Santi Mina rəqib futbolçuların səhvindən yararlanıb. 20 dəqiqə sonra hesab bərabərləşib. Kərim Benzema fərqlənib. Amma fasiləyə kimi qonaqlar yenidən hesabı xeyirlərinə dəyişiblər. Bu dəfə Franko Çervi hədəfdən yayınmayıb. 2-ci hissə başayan kimi “Real” tarazlığı bərpa edib. Benzema başla dəqiq və qüvvətli zərbə endirib - 2:2. Az sonra “Real” hesabda önə keçib. Bu dəfə Vinisius Junior fərqlənib. 66-cı dəqiqədə Karlo Ançelotti “Real”ın yeni transfer Eduardo Kamavinqanı mübarizəyə qoşub. Eden Azarı əvəzləyən 18 yaşlı fransalı debüt görüşünü qolla qeyd edib. O, meydana çıxandan 6 dəqiqə sonra topu qapıdan keçirib. Oyunda son nöqtəni het-trik edən Kərim Benzema qoyub. “Real” – “Selta” 5:2. Bu mövsüm 5-ci qolunu vuran fransalı forvard bombardirlər yarışında liderliyə yüksəlib. Qeyd edək ki, 4 turdan sonra “Real”, “Valensiya” və “Atletiko” 10 xalla turnir cədvəlinə başçılıq edir.