“Qarabağ” UEFA Konfrans liqasının 3-cü təsnifat mərhələsinin cavab görüşündə AEL komandasını qəbul edib. Xatırladaq ki, bu komandaların Kiprdə keçirilən oyununda 1:1 hesabı qeydə alınmışdı. Tofiq Bəhramov adına Respublika stadionunda təşkil olunan cavab görüşünə “Qarabağ” futbolçuları gözlənildiyi kimi fəal başlayıblar. Onlar bir neçə epizodda hesabı açmağa yaxın olsalar da, zərbələrdə dəqiqlik çatışmayıb. Ağdam futbolçuları sona yaxın istəklərinə çatıblar. 87-ci dəqiqədə yeni transfer Kadi Borqes effektli zərbəylə “Qarabağ”ı irəli keçirib.
Bu, “köhlən atlar”ın UEFA Konfrans Liqasında pley-ofa çıxması üçün kifayət edib. AEL isə avrokuboklarla vidalaşıb. “Qarabağ” UEFA Konfrans liqasının pley-ofunda “Aberdin”lə görüşəcək. İlk oyun avqustun 19-u Bakıda keçirilməlidir.