Argentina millisinin, habelə İspaniyanın “Barselona” klubunun hücumçusu Lionel Messi Kataloniyadakı karyerasına yekun vurub.
Klub İspaniya çempionatının maliyyə qaydalarına görə 34 yaşlı futbolçu ilə yeni müqavilə bağlaya bilməyib. Bildirilib ki, bir müddət öncə tərəflər arasında yeni müqavilə ilə bağlı razılıq əldə olunsa da, maliyyə şərtləri və digər məsələlərə görə anlaşmaya xitam verilib. "Barselona" 34 yaşlı forvarda xidmətlərinə görə təşəkkür edib, ona gələcək karyerasında uğurlar arzulayıb. Qeyd edək ki, Messi 2003-cü ildən "Barselona"da çıxış edirdi. O, bu komandanın heyətində 10 dəfə İspaniya çempionu olub. 7 dəfə ölkə kubokunu, səkkiz dəfə isə İspaniya superkubokunu qazanıb. Ümumilikdə 4 dəfə Çempionlar Liqasının qalibi olan təcrübəli hücumçu üç dəfə UEFA Super Kubokunda və klublararası dünya çempionatında qələbə sevinci yaşayıb. Fərdi nailiyyətlərinə nəzər saldıqda isə Argentinalı forvard 6 dəfə “Qızıl top” mükafatina, 1 dəfə dünyanın ən yaxşı futbolçusu, 3 dəfə isə ən yaxşı oyunçusu adına da layiq görülüb. Artıq Lionel Messi ilə danışıqlar aparan digər komandalar da məlumdur. Təcrübəli futbolçunun Fransanın PSJ kollektivi ilə əlaqədə olduğu bildirilir. Avropa mətbuatının xəbərinə görə “Mançester Siti” də Messini düşərgəsinə cəlb etməkdə maraqlıdır.