Bu gün UEFA Avropa Liqasının yarımfinalı başlanır. “Old Trafford”a “Mançester Yunayted” “Roma”nı qəbul edəcək. İngiltərə təmsilçisi ¼ finalda İspaniyanın “Qranada” komandasını hər iki görüşdə 2 cavabsıəz qolla məğlub edərək mərhələ adlayıb. İtaliyalılar isə “Ayaks” səddini aşıblar. “Roma” “Mançester Yunayted”lə bunadək 7 dəfə üz-üzə gəliblər. Görüşlərdən 5-də İngiltərə futbolçuları qələbə qazanıblar. 1 oyunda rəqib komanda üstün olduğu halda, digərində qalib müəyyənləşməyib. “Mançester Yunayted”in baş məşqçisi Ule Qunnar Sulşer mətbuat konfransında bu üstünlüyü davam etdirəcəyini bildirib: “Rəqiblə aramızdakı oyunlara baxsaq açıq-aşkar üstün olduğumuzu görərik. Bunu davam etdirmək niyyətindəyik. Başa düşürük. “Roma”nın heyətində güclü futbolçular var. Lakin, bu gün qələbə qazanan biz olmalıyıq. Meydanın hər qarışı uğrunda mübarizə aparacağıq”.
“Roma”nın baş məşqçisi Paulu Fonseka isə “Mançester Yunayted”i turnirin favoriti adlandırıb: “Mükəmməl komandaya qarşı oynayacağıq. Mən rəqibi Avropa Liqasının favoriti sayıram. Çətin olacaq. Amma “mançester Yunayted” məğlubedilməz deyil. Bu vacib görüşün məsuliyyətini dərk edirik. Ümid edirik ki, azarkeşlərimizi sevindirərik”.
Qeyd edək ki, “Mançester Yunayted” - “Roma” görüşü bu gün Bakı vaxtı ilə saat 23-də başlanacaq.