Andrea Pirlo: "Portu"nu keçəcəyimizə inanıram"

UEFA Çempionlar Liqasının 1/8 finalında “Yuventus” “Portu”nu qəbul edəcək.

İlk oyunda 1-2 hesabı ilə məğlub olan “Qoca Sinyora” qələbə arzusundadır. Qonaqlar isə meydana qapılarını toxunulmaz saxlamaq üçün çıxacaqlar. Heyətlərə nəzər saldıqda Portuqaliya klubunun daha yaxşı vəziyyətdə olduğunu görə bilərik. Belə ki, “Yuventus”un heyətində Rodriqo Bentankur, Danilo, Paulo Dibala, Matteys De Liqt oyunu kənardan izləyəcək. “Portu”da isə yalnız Muhammed Mbaye zədəlidir. “Yuventus”un baş məşqçisi Andrea Pirlo mətbuat konfransında qarşılaşma ilə bağlı fikirlərini bildirib: “Rəqib keçilməz deyil. Bizim hədəflərimiz böyükdür. Məqsədimizə doğru inamla addımlamalıyıq. Rəqibin zəif cəhətlərini bilirik. Komandama müəyyən tapşırıqlar vermişəm. Mərhələni keçəcəyimizə inanıram”.

“Portu”nun baş məşqçisi Serjiu Konseysau rəqibin ulduz futbolçularını fərqləndirib:  “Bilirik ki, rəqibin heyətində ulduz futbolçular var. Mən Kriştianu Ronaldunu xüsusi fərqləndirərdim. Əsasən müdafiəyə üstünlük verəcəyik. Azı heç-heçə etmək üçün müabrizə aparacağıq. Əks halda arzularımız puç olacaq”.

Qeyd edək ki, “Yuventus” – “Portu” matçı gecə yarısı başlanacaq.