Futbol üzrə Azərbaycan çempionatında ilin son oyunları keçirilib. 13-cü turda “Keşlə”yə qalib gələn “Neftçi” liderliyini qoruyub. “Qarabağ” “Zirə” ilə matçda əzmkar oyun nümayiş etdirib. “Sabah” və “Qəbələ” isə səfər görüşlərində qalib gəlib.
Azərbaycan çempionatının 13-cü turunda lider “Neftçi” “Keşlə”ni qəbul edib. Görüşə daha yaxşı başlayan meydan sahibləri çox çalışsalar da, ilk hissədə hesabı aça bilməyiblər. İkinci hissədə Mirabdulla Abbasov fərqlənib. Qonaqlar çox keçmədən tarazlığı bərpa ediblər. Rəhman Hacıyev uzaq məsafədən zərbəsi dəqiq olub. Ruhdan düşməyən “ağ-qaralar” matçın sonlarında hesabı yenidən öz xeyirlərinə dəyişiblər. Mirabdulla Abbasov dubl edib. 2-1 hesabı ilə qalib gələn “Neftçi” 24 xalla liderdir.
“Qarabağ” – “Zirə” görüşünə qonaqlar daha yaxşı başlayıblar. 2-ci dəqiqədə hesab açılıb. Ağabala Ramazanov fərqlənib. Fasiləyə üstün yollanan Rəşad Sadıqovun komandası ikinci yarının əvvəllərində fərqi artırıb. Lazar Corceviç rəqib qapısına yol tapıb. Çox keçmədən Mahir Emreli toplardan birinin əvəini çıxıb. 75-ci dəqiqədə “Zirə azlıqda qalıb. Dmitrios Çantakias oyundan kənarlaşdırılıb. Say üstünülüyündən istifadə edən Ağdam təmsilçisi 2 qol vuraraq qələbə qazanıb. Ovusu Kvabena dubl edib. 3-2 hesabı ilə qalib gələn “Qarabağ” 23 xalla ikinci pillədədir.
“Sumqayıt” – “Sabah” matçında əksəriyyət meydan sahiblərinin qələbəsinə inansa da, qonaqlar bu fikirdə olanları yanıldıblar. “Sabah” 2-1 hesabı ilə qələbə qazanıb. Hesabı 26-cı dəqiqədə “Sabah”ın heyətindən Slavik Alxasov açsa da, az sonra Xəyal Nəcəfov tarazlığı bərpa edib. İkinci yarıda penaltidən fərqlənən Aleksey İsayev “Sabah”a qələbə qazandırıb. Buna baxmayaraq “Sabah” 13 xalla autsayderdir. “Sumqayıt” isə 16 xalla 4-cüdür.
“Səbail” – “Qəbələ” qarşılaşmasında isə 4 qol vurulub. İlk hissədə qonaqlardan Ülvi İsgəndərovla Asif Məmmədov fərqlənib. İkinci yarıda Turan Manafov toplardan birinin əvəzini çıxsa da, bu, azı 1 xal üçün kifayət etməyib. Son dəqiqələrdə fərqlənən Ceyms Adeniyi mübarizəyə nöqtə qoyub. 3-1 hesabı ilə qələbə qazanan “Qəbələ” 15 xalla 5-cidir.