“Böyük dəbilqə” seriyasından “Rolan Qarros” turniri tədricən sona yaxınlaşır. Artıq yarımfinalçıların adları məlumdur. Kişilərin mübarizəsində iddialı idmançılar böyük çətinlik çəkmədən növbəti mərhələyə adlayıblar. Qadınların turnirində də favoritlər uğur qazanıblar.
Rolan Qarros” turnirində yarımfinalçıların adlarına aydınlıq gəlib. ATP reytinqinin lideri Novak Cokoviç ispaniyalı Pablo Karrenyo Bustanı 3:1 hesabilə məğlub edərək ən güclü 4 tennisçi sırasına çıxıb. Serbiyalı raketka ustası yarımfinalda Stefanos Sitsipasla görüşəcək.
Sitsipas 1/4 finalda rusiyalı Andrey Rublyovu 3 setdə məğlub edərək Cokoviçlə qarşılaşmaq hüququ qazanıb.
Yarımfinalın digər cutundə isə argentinalı Dieqo Şvartsmanla ispaniyalı Rafael Nadal üz-üzə gələcək.
Qadınların yarışına gəlincə, çexiyalı Petra Kvitova, almaniyalı Laura Ziqemunda aman verməyib. Kvivota hər iki seti üstün tamamlayaraq yarımfinala yüksəlib. Çexiyalı raketka ustası bu mərhələdə amerikalı Sofiya Keninlə qarşılaşacaq. Kenin həmvətəni Daniel Kollinzi mübarizədən kənarlaşdırıb.
Yarımfinalın digər görüşü polşalı İqa Şvyonteklə Argentinalı Nadya Podoroska arasında olacaq.