İngiltərə Premyer Liqasında vəsiqə qazanan 2-ci komandanın da adı məlum olub. “Lids”dən sonra “Vest Bromviç” elitaya yüksəlib. 3-cü komanda isə pley-off qarşılaşmalarından sonra müəyyənləşəcək.
"Vest Bromviç" son turda doğma meydanda Kuinz Park Reyncersi qəbul edib. Hesabı 34-cü dəqiqədə qonaqlar açıblar. Rayan Manninq fərqlənib. Amma fasiləyə kimi Qreydi Dianqana tarazlığı bərpa edib 1:1. 2-ci hissədə də tərəflər hərəyə 1 qol vurublar. Əvvəlcə Kallum Robinson, ardınca isə Ebereçi Eze hədəfdən yayınmayıb 2:2. Paralel keçirilən görüşdə Brentfordun Barnsli-yə uduzması komandanın işinə yarayıb. Beləliklə yarışı 83 xalla 2-ci pillədə başa vuran "Vest Bromviç" Premyer Liqaya vəsiqə qazanıb. Bununla da komanda 2 illik fasilədən sonra yenidən elitada çıxış edəcək. Premyer Liqaya 3-cü vəsiqənin taleyi isə ilk 6-lıqda olan digər komandaların pley-off qarşılaşmalarından sonra müəyyənləşəcək. Brentford Suonsi ilə Fulhem Kardiflə qarşılaşacaq. Bu cütlüklərin qalibi isə finalda premyer liqaya son vəsiqə uğrunda mübarizə aparacaq.
Əlavə edək ki, Çarlton Uiqan və Hall Siti çempionşipi tərk edərək daha aşağı liqaya düşüblər.