UEFA Konfrans Liqasında çıxış edən təmsilçilərimizdən “Zirə” 3-cü təsnifat mərhələsinin ilk oyununa çıxıb. Komandamız Xorvatiyanın Osiyek şəhərində yerli komanda ilə üz-üzə gəlib. İlk hissədən təmsilçimiz inamlı oyunu ilə seçilsə də hesabı açan tərəf Xorvatiya klubu olub. 38-ci dəqiqədə Anton Matkoviç topu qapımızdan keçirib. Qoldan sonra irəli atılan Rəşad Sadıqovun futbolçuları bərabərliyi ikinci hissəyə artırılan dəqiqələrdə təmin edə bilib. Rafael Utziq təyin olunan penaltini dəqiq yerinə yetirib. “Osiyek” – “Zirə” 1:1.
“Sabah” isə İrlandiyada “Sent Patriks”in qonağı olub. Masazır klubu sürətli hücumlarla rəqibi cərimə meydançasına çəkilməyə məcbur etsə də səyləri nəticəsiz qalıb. 35-ci dəqiqədə Romal Palmer fərqlənərək hesabı açıb. Bərabərlik axtarışında olan “Sabah” ikinci hissədə növbəti dəfə uğursuzluqla üzləşib. İvan Lepinitsa qırmızı vərəqə ilə cəzalanaraq meydandan çıxarılıb. Qalan vaxtda hesab dəyişməyib. “Sent Patriks” – “Sabah” 1:0. Qeyd edək ki, komandalarımız cavab qarşılaşmasına avqustun 15-də Bakıda çıxacaq.