DÇ ilə AÇ-lərin seçmə mərhələsinin və Millətlər Liqasının formatı dəyişdirildi

26 Yanvar, 14:12 Sosial mediada paylaşın:
UEFA    Millətlər Liqası, eləcə də Avropa və dünya çempionatlarının seçmə mərhələlərinin formatını dəyişib. Radikal qərar qurumun İcraiyyə Komitəsinin iclasında qəbul olunub.2024-cü ildən tədbiq ediləcək yeniliyə əsasən, Millətlər Liqasında "Dördlər finalı"ndan əvvəl pley-off oyunları keçiriləcək. A divizionunda qrup birinciləri ilə ikinci yeri tutan komandalar 2 görüş keçirəcək. Qaliblər "Dördlər finalı"na vəsiqə əldə edəcək.
Bundan başqa, A divizionunda üçüncü yeri tutanlar B divizionunun ikinciləri, B divizionunda  üçüncü olanlar isə C divizionunun ikinciləri ilə daha aşağı liqaya düşməmək və ya əksinə, yuxarı liqaya qalxmaq uğrunda pley-off matçları oynayacaqlar.
Seçmə mərhələlərdə isə qrupların sayı artırılacaq. Ölkələr hərəsində 4 və ya 5 komanda olmaqla 12 qrupa bölünəcək. Qrup qalibləri Avropa və ya dünya çempionatlarına birbaşa vəsiqə qazanacaq. İkinci yeri tutan yığmalar isə nüfuzlu turnirlərə ya birbaşa, ya da pley-off matçlarından sonra yollanmaq hüququ əldə edəcəklər.
2024-cü ildə keçiriləcək Avropa çempionatında isə komanda sayının artırılmayacağı açıqlanıb.
UEFA Super Kuboku uğrunda oyunun Rusiyanın Kazan şəhərində keçirilməyəcəyi də təsdiqlənib. Builki qarşılaşma Yunanıstanın paytaxtı Afinada olacaq. Görüş avqustun 16-sı "Georgios Karaiskakis" stadionunda təşkil ediləcək.
Xatırladaq ki, Ukraynaya hərbi müdaxilə səbəbindən Rusiyada UEFA bayrağı altında hansısa matçın və ya turnirin keçirilməsinə qadağa qoyulub. Həmçinin ölkənin yığmaları və klubları avrokuboklardan kənarlaşdırılıb.

CANLI YAYIM