Azərbaycan Tennis Federasiyasının erməni əsilli Rusiya idmançısı Karen Xaçanovun "Avstraliya Açıq" turnirindəki təxribatı ilə bağlı Beynəlxalq Tennis Federasiyasına şikayəti qəbul olunub.
Bununla bağlı Beynəlxalq Federasiyanın  Azərbaycan Tennis Federasiyasına göndərdiyi məktubda  Xaçanovun oyunlardan sonra meydandakı kameraya yazdığı mesajla bağlı şikayəti turnirin təşkilatçısı olan “Tennis Australia”ya  yönləndirildiyi bildirilir.  Qeyd olunub ki,  "Böyük Dəbilqə” Davranış Kodeksinə əsasən, Avstraliya Tennisi və İdarə Heyəti "Avstraliya Açıq" turniri və orada iştirak edən oyunçuların davranışı ilə bağlı yurisdiksiyaya malikdir. Onlar “Böyük Dəbilqə” Davranış Kodeksinə zidd hesab oluna bilən hər hansı hərəkəti araşdırmaq üçün müvafiq orqandırlar və istənilən növbəti tədbir planı həmin Davranış Məcəlləsində müəyyən edilmiş prosedurlara uyğun olaraq həyata keçiriləcək. Azərbaycan Tennis Federasiyasından isə bildirilib ki, Beynəlxalq Tennis Federasiyası qarşıda baş verə biləcək hər hansı təxribatı nəzərində saxlasa da, Xaçanovun bundan əvvəlki əməllərinə görə hansısa tədbir görməməsi qurumu ciddi narahat edir: "Ona görə də əvvəlki təxribatlara görə erməni əsilli idmançının cəzalandırılması üçün yenidən beynəxalq quruma müraciət ünvanlanacaq".Qeyd edək ki, Xaçanov ardıcıl 2 oyundan sonra kameranın obyektivinə Qarabağdakı separatçı rejimin təbliği ilə bağlı yazı qeyd edib. Yarışda həmçinin Ermənistanla yanaşı, separatçı rejiminin bayrağı açılıb. Bu hadisələrdən sonra Gənclər və İdman Nazirliyi ilə Azərbaycan Tennis Federasiyası müvafiq qurumlara etiraz məktubu ünvanlayıb.