Basketbol üzrə Azərbaycan çempionatında 6-cı turun oyunları davam edir.
Artıq bu turdan etibarən İdman TV liqanın oyunlarının yayım hüququna sahib çıxıb. Kanalımız ilk olaraq B qrupunda mübarizə aparan “Ordu” ilə “Sumqayıt” oyununu yayımlayıb. “Sərhədçi” İdman Kompleksində keçirilən oyunda meydan sahibləri ilk dəqiqələrdən təşəbbüsü ələ alıb. “Ordu” basketbolçuları ilk periodu 30:21 hesabı ilə öndə başa vurub. Fasiləyə qədər Alberto Blankonun komandası fərqi 24 xala qədər yüksəldib. İkinci hissədə də oyunun ssenarisi dəyişməyib. 3-cü bölümdə meydan sahibləri rəqibə fəallıq nümayiş etdirməyə imkan verməyib. Yalnız son bölümdə qonaqlar daha məhsuldar oyun nümayiş etdirib. Buna baxmayaraq, çempiotın debütantı meydanı böyükhesablı qələbə ilə tərk edib: Ordu – Sumqayıt 115:81. Görüşün ən məhsuldar oyunçusu Camar Qreqq olub. “Ordu” klubunun amerikalı basketbolçusu meydanı 19 xalla tərk edib. Beləliklə də, 6 turdan sonra “Ordu” 10-cu xalını qazanaraq liderliyə yüksəldib. “Sumqayıt” isə 7 xalla sonuncudur.