İspaniya La Liqasında 36-cı turun oyunları başlanıb.
Avrokuboklara vəsiqə uğrunda mübarizə aparan “Vilyarreal” mövsümün sürpriz komandalarından “Jirona”nın qonağı olub. Gərgin mübarizənin ilk hissəsində qol olmayıb. Fasilədən sonra “Vilyarreal” futbolçuları önə keçiblər. Bertran Traore meydan sahiblərinin qapısına yol tapıb. Qonaqlar sərfəli hesabı sonadək qoruyaraq minimal hesabla qalib gəliblər. “Jirona” isə 4 oyundan sonra uduzub. “Vilyarreal” hazırda 51 xalla 8-cidir. UEFA Konfrans Liqasına vəsiqə verən 7-ci pillədə “Real Sosyedad” qərarlaşıb. Baskoniya klubunun hesabında 54 xal var. “Jirona” isə ilk 4-lükdə yerini təmin edərək növbəti mövsüm tarixində ilk dəfə avrokuboklarda, daha dəqiq UEFA Çempionlar Liqasında mübarizə aparmaq hüququ qazanıb.
Çempionluğu təmin edən “Real” Madrid isə dayanmaq bilmir. “Kral klubu” 36-cı turda “Alaves”i çətinlik çəkmədən məğlub edərək La Liqada ardıcıl 9-cu qələbəni qazanıb. Madrid klubu ilk hissədə rəqibi 3 dəfə məyus edib. Cud Bellinqem, Vinisius Junior və Federiko Valverde “Alaves”in qapısına yol tapıb. 2-ci yarıda Vinisius dubl edib. 81-ci dəqiqədə Arda Gülər son nöqtəni qoyaraq “Real”ın inamlı qələbəsini təmin edib 5:0.