Misli Premyer Liqasında 17-ci tur yekunlaşıb.
Azərbaycan derbisində lider “Qarabağ” Tofiq Bəhramov adına Respublika stadionunda “Neftçi”ni qəbul edib. Ağdam futbolçularının üstünlüyü şəraitində keçən oyunun ilk hissəsində hesab açılmayıb. Qurban Qurbanovun komandası 71-ci dəqiqədə istəyinə çatıb. Yassin Benziya Juninyonun ötürməsindən sonra qapını dəqiq nişan alıb. “Qarabağ” inamlı çıxışını sonadək davam etdirərək əlavə olunan 2-ci dəqiqədə daha bir qol vurub. Patrik Andradenin zərbəsindən sonra “Neftçi”nin qapıçısı Rza Cəfərov topu dəf etsə də, Hamidu Keyta yaxın məsafədən fürsəti qaçırmayıb. Beləliklə “Qarabağ” “Neftçi”yə 2:0 hesabilə qalib gəlib. Ardıcıl 6-cı oyunda qələbə qaznana “köhlən atlar” xallarının sayını 38-ə çatdıraraq zirvədə möhkəmlınib. “Zirə” 29 xalla 2-ci, “Səbail” 26 xalla 3-cüdür. Eyni miqdarda xal toplayan “Araz Naxçıvan” 4-cü pillədədir. “Neftçi” isə 25 xalla 5-cidir.