İngiltərə Premyer Liqasında ilk turun növbəti görüşləri keçirilib.
Mərkəzi qarşılaşmada "Çelsi" "Liverpul"u qəbul edib. Oyunda hesab 18-ci dəqiqədə açılıb. Məhəmməd Salahın ötürməsini lazımınca dəyərləndirən Luis Dias qonaqları hesabda önə çıxarıb. 37-ci dəqiqədə "Çelsi" tarazlığı bərpa edib: "zadəganlar"ın yeni transferi Aksel Disasi Mersisayd klubunun qapısına yol tapıb. Matçın qalan hissəsində komandaların qarşılıqlı cəhdlərinə baxmayaraq, başqa qol olmayıb. Beləliklə, "Çelsi" və "Liverpul" mövsümə 1 xalla start verib.
Günün digər oyununda da heç-heçə qeydə alınıb. "Tottenhem" 2023-2024-cü illər mövsümünə "Brentford" səfərində başlayıb. 11-ci dəqiqədə yeni transfer Ceyms Meddisonun məhsuldar ötürməsindən sonra Kristian Romero meydan sahiblərini məyus edib. "Brentford"un cavabı gecikməyib. 26-cı dəqiqədə Brian Mbömo penaltini dəqiq yerinə yetirərək hesabı bərabərləşdirib. Tomas Frankın komandası bir qolla kifayətlənməyib. Bu səfər Yoan Vissa diqqət mərkəzinə düşüb. Lakin "Brentford" üstünlüyü qoruya bilməyib. Birinci hissəyə artırılmış 4-cü dəqiqədə Emerson Royal fərqlənərək yekun hesabı müəyyənləşdirib. "Brentford" - "Tottenhem - 2:2.
Premyer Liqada ilk tura bu gün keçiriləcək "Mançester Yunayted" - "Vulverhempton" görüşü ilə yekun vurulacaq.