Ümumi mükafat fondu 6 milyon avrodan çox olan Monte Karlo turnirində 1/8 final mərhələsinin görüşləri keçirilib. Günün sensasiyası, dünya reytinqinin lideri Novak Cokoviçin uduzması olub. Serbiyalı raketka ustası italiyalı Lorentso Muzetti ilə bacarmayıb. Hərçənd ki, gərgin keçən 1-ci hissədə Cokoviç üstün olub - 6:4.
2-ci set daha gərgin və maraqlı olub. Hər iki tərəfin ardıcıl 2 dəfə öz servisində uduzması diqqət çəkib. Ümumiyyətlə bu setdə 9 breyk xalı qeydə alınıb. Cokoviçin 5 dəfə servisini dəf edən Muzetti 7:5 hesabı ilə qələbə qazanaraq, ümumi hesabı bərabərləşdirib 1-1.
3-cü – həlledici setdə Cokoviçin 1 dəfə servisdə səhvə yol verməsi həlledici olub. Yekunda bu hissədə 6:4 hesabı ilə üstün olan italiyalı tennisçi ümumi hesabda da qələbə əldə edib. Bununla da, Lorentso Muzetti karyerasında ilk dəfə dünya reytinqində lider olan tennisçiyə qalib gəlib.