Milli Xokkey Liqasında müntəzəm çempionatın növbəti oyunları keçirilib. Şərq Konfransının liderlərindən olan “Toronto Məpl Lifs” “Tampa Bey Laytinqs”lə münasibətlərinə aydınlıq gətirib. İlk periodda meydan sahibləri hesabı açıb. İkinci kanadalılar daha bir qol vurub. Son bölüm daha maraqlı mübarizə şəraitində keçib. Əvvəlcə qonaqlar hesab arasında fərqi azaldıb. Buna baxmayaraq görüşün sonlarında bir dəqiqə ərzində 2 qol vuran “Toronto” son 5 oyunda qalib gələn “Tampa Bey” üzərində 4:1 hesablı qələbə qazanıb.
Şərq Konfransında liderlər qrupunda qərarlaşan “Karolina Hərrikeyns” də azarkeşlərini eyni hesablı qələbə ilə sevindirib. Maraqlıdır ki, “Nyu Cersi” oyunda da ilk hissədə meydan sahibləri bir qol vuraraq fasiləyə üstün vəziyyətdə yollanıb. İkinci hissədə təzyiqi daha da artıran “Karolina” daha iki dəfə rəqibi məyus edib. Son bölümdə isə komandalar hərəyə bir dəfə fərqlənib. Beləliklə də “Karolina” “Nyu Cersi”ni 4:1 hesabıyla məğlub edərək ardıcıl 6-cı qələbəsini qazanıb. “Devils” isə ardıcıl 6-cı görüşündə də uduzub.