“Qarabağ” UEFA Avropa liqasının qrup mərhələsində sonuncu matça çıxıb.
Ağdam klubu Bakıda qrup liderliyini təmin edən “Frayburq”u qəbul edib. Komandamız matça güclü hücumlarla başlayıb. Artıq 5-ci dəqiqədə Kvabena Ovusu təhlükəli zərbə ilə yadda qalıb. 10-cu dəqiqədə isə Kadi Qarabağı önə çıxarmağa yaxın olub. Komandamızın üstünlüyü şəraitində keçən görüşdə qonaqlar hesabı açıblar. 23-cü dəqiqədə Bəhlul Mustafazadənin cərimə meydançasında Kevin Şadeyə qarşı kobudluğuna görə qapımıza penalti təyin edilib. Nils Pedersen fürsəti qaçırmayıb. Fasilə ərəfəsində Kadi hesabı bərabərləşdirməyə yaxın olsa da, qapıçı Noa Atubolu yenə qola imkan verməyib. “Qarabağ” 2-ci yarıda da fəal oyunu ilə seçilib. 50-ci dəqiqədə “Frayburq”un cərimə meydançasında Marko Veşoviçə qarşı kobudluğa görə rəqibin qapısına 11 metrlik zərbə təyin edilib. Lakin VaR-a baxılandan sonra qərar ofsayda görə ləğv olunub. Çox keçmədən Veşoviç bir daha diqqət mərkəzinə düşüb. Monteneqrolu futbolçu topu qapıdan keçirsə də, qol yenə oyundan kənar vəziyyətə görə sayılmayıb. 58-ci dəqiqədə Bəhlul Mustafazadə səhvini düzəltmək üçün əla fürsət qazanıb. Lakin millimizin müdafiəçisi topu yaxın məsafədən qapıdan keçirə bilməyib. 59-cu dəqiqədə komandamız daha bir zərbəyə məruz qalıb. Kevin Medina rəqibin yarımmüdafiəçisi Kevin Şadeyə müdaxilə edəndən sonra əvvəlcə sarı vərəqəylə cəzalansa da, var-a baxılandan sonra futbolçumuza qırmızı vərəqə göstərilib. Qarabağ azlıqda qalsa da, rəqib qapısı qarşısında təhlükəli vəziyyətlər yaratmağa davam edib. 2-ci hissəyə artırılan dəqiqədə “köhlən atlar” nıhayət istəklərinə çatıblat. Toral Bayramovun ötürməsini Ovusu Kvabena lazımınca qiymətləndirib. Qalan vaxtda ağdam futbolçuları nə qədər çalışsalar da, 2-ci qolu vura bilməyiblər: “Qarabağ” – “Frayburq” 1:1
G qrupunun digər görüşündə “Nant” Yunanıstanda “Olimpiakos”u 2:0 hesabilə məğlub edərək komandamızı qabaqlayıb. Beləliklə “Fraqyburq” 14 xalla lider kimi, “Nant” 9 xalla 2-ci pillədən UEFA Avropa Liqasının pley-offuna yüksəlib. 8 xalla 3-cü olan “Qarabağ” mübarizəni Konfrans Liqasının 1/16 finalında davam etdirəcək. “Olimpiakos” isə 2 xalla G qrupunyn autsayderi olub.