"Red Bull" öz mühərriklərini istehsal edəcək

16 Fevral, 17:30 Sosial mediada paylaşın:
Formula 1 komandaları arasında güc nisbətinin fərqli olmasının əsas səbəblərindən biri mühərriklə bağlıdır. Adətən aparıcı zavod komandaları öz mühərriklərindən istifadə etdiklərinə görə yüksək yerlər uğrunda mübarizə aparırlar. Digərləri isə bu mənada çətin vəziyyətdə qalır. Buna misal olaraq “Red Bull”un adını çəkmək olar. Artıq avstriyalılar vəziyyətdən çıxış yolunu da tapıb.
“Red Bull” 2022-ci ildən fərdi şəkildə öz mühərriklərini istehsal edəcək. Ancaq avstriyalılar bunu “Honda”nın texniki bazası əsasında həyata keçirəcək. “Red Bull”u belə bir addım atmağa məcbur edən də elə “Honda”nın gələn ildən Formula 1-dən gedişi olacaq.  Yeri gəlmişkən, “Honda” texnologiyalarından “Red Bull”un farm komandası olan “Alfa Tauri” də yararlanacaq. Ümumilikdə isə mühərrik istehsalı ilə “Red Bull Powertrains Limited” şirkəti məşğul olacaq. Motorlar isə bu komandanın Milton-Keynsdəki bazasında istehsala buraxılacaq.
Bu arada mətbuata açıqlama verən “Red Bull”un məsləhətçisi Helmut Marko “Honda”nın hibrid mühərriklərinə keçməyə hazırlaşdıqlarını söyləyib. O, “Honda” ilə əməkdaşlığın uğura bərabər olduğunu bildirib. Məhz yeni mühərriklər sayəsində komanda rəhbərliyi rəqabətə davamlı olacaqlarına inanır.

CANLI YAYIM