Haqqımızda

İDMAN TV KANALI HAQQINDA

“İDMAN TV” kanalı fəaliyyətə başladığı ilk günlərdən ölkəmizdə aparılan idman siyasətinin uğurla həyata keçirilməsinə çalışır. Bu siyasətin ən mühüm tərkib hissəsi odur ki, yeniyetmə və gənclərimiz, cəmiyyətimizin bütün üzvləri idman məşğələlərinə cəlb olunsun, bununla da biz tariximizin sağlam gələcəyini təmin edə bilək. 2009-cu ilin əvvəlində prezident İlham Əliyevin təşəbbüsü ilə yaradılan “İDMAN TV” kanalı illərdən bəri məhz bu mərama xidmət edir.

Telekanalın maddi-texniki bazası idman yarışlarından reportajların, ayrı-ayrı proqramların operativ şəkildə efirə verilməsinə gözəl şərait yaradır. Müxtəlif növlər üzrə Avropa və dünya çempionatlarında, Yay Olimpiya Oyunlarında atletlərimizin uğurlu çıxışları haqqında tamaşaçılarımıza müntəzəm məlumat verilir, Bakı-2015 ilk Avropa Oyunları və Bakı-2017 İslam Həmrəyliyi Oyunlarından, həm də 4-cü İslam həmrəyliyi Oyunlarından proqramlar müxtəlif qitələrə-120-dən artıq ölkəyə yayımlanırdı.Yarışlardan sonra prezident İlham Əliyev Azəbaycan Televiziyası və ”İDMAN TV” kanalının yayımlarının keyfiyyətini yüksək qiymətləndirdi, kollektivin fəaliyyətini isə nümunə göstərdi. Bundan başqa Azərbaycan Televiziyasına Beynəlxalq İdman Yayımı Şirkətinin xüsusi sertifikatı təqdim olundu.

Hazırda “İDMAN TV” kanalının ayrı-ayrı verilişlərində - ”İdman-Xəbər”, İdman həftəsi”, ”Flaqman”, ”İdman məbədi”, “Televiziya şahmat klubu”, “Favorit”, ”Avrofutbol”, ”İdman və media”, “Futbol klubu”,”Oyunun hakimi”,“İnstasport”,“İdman rekordları”, “Debüt”, “IQ Arena”, “Derbi”, “Sabahın ulduzları”, ”İdman korifeylərimiz” və başqa proqramlarda, eləcə də, dünyanın ən maraqlı futbol turnirlərindən sayılan – İspaniya La-Liqası, Almaniya Bundesliqası və İngiltərə Premyer Liqasının oyunlarından reportajlar zamanı müxtəlif yaradıcılıq üsulları tətbiq olunur. Dünya və Azərbaycan idmanının ulduzları haqqında vaxtaşırı sənədli telefilmlər hazırlanıb efirə verilir.

Yaradıcılıq nailiyyətləri ilə birlikdə, texniki uğurlar da az olmayıb. 2010-cu il yanvarın 15-dən proqramların peyk vasitəsilə yayımı başlanıb, verilişlərin gündəlik həcmi 15 saata çatdırılıb. 2015-ci il oktyabrın 12-dən “İDMAN TV” kanalı gecə-gündüz - 24 saatlıq iş rejiminə keçib. Elə həmin ilin noyabrından kanalın proqramları HD formatında yayımlanır. Bu yenilik videotəsvirlərin daha rahat vizual qəbuluna imkan yaradır.

Dünya ölkələrində idman kanalı açıq efir vasitəsilə yayımlanmır, buna görə maliyyə vəsaiti ödənilir. Respublikamızda isə tamaşaçılar heç bir aylıq haqq ödəmədən “İDMAN TV” kanalının proqramlarına, müxtəlif ölkələrdən ən maraqlı idman yarışlarına baxa bilirlər.

Yay və Qış Olimpiya Oyunları, ümumdünya universiadaları, Avropa Gənclərinin Olimpiya Festivalı, müxtəlif növlər üzrə dünya və qitə çempionatları, Formula-1 turnirləri, UEFA Çempionlar Liqası, Avroliqa, habelə Avropa Voleybol Konfederasiyasının ən mötəbər yarışları, ölkəmizin milli çempionatları məhz bizim kanalda peşəkarlıqla azarkeşlərə təqdim olunub.

Qeyd edək ki, planetimizdə ən çöx maraq doğuran yarışlardan biri - futbol üzrə dünya çempionatının yayımı 2014 və 2018-ci illərdə “İDMAN TV” kanalına həvalə edilmişdi. 2020-ci il Tokio olimpiadasının respublikamızda yayım hüququ barədə də artıq razılıq əldə olunub. Növbəti mövsümün daha bir mötəbər idman tədbiri - futbol üzrə Avropa çempionatının qrup və pley-off oyunlarının da “İDMAN TV” kanalında göstəriləcəyi gözlənilir.

STRUKTUR

NOVRUZOV RÖVŞƏN TAHİR OĞLU

26 dekabr 1958-ci ildə Ağdam rayonu Mirəselli kəndində anadan olub. 1976-cı ildə Ağdam şəhər 8 №-li orta məktəbi bitirib. 1977-1979-cu illərdə Sovet ordusunda hərbi xidmətdə olub.

1981-ci ildə Azərbaycan Dövlət Universitetinin (Bakı Dövlət Universiteti) Jurnalistika fakültəsinə daxil olub, 1987-ci ildə oranı bitirərək Jurnalist ixtisasına yiyələnib.

Əmək fəaliyyətinə 1976-cı ildə Ağdam rayon İstehlak Cəmiyyətinin inşaat briqadasında fəhlə kimi başlayıb. 1981-1991-ci illərdə Rayon Gənclər Təşkilatında müxtəlif vəzifələrdə çalışıb. Dağlıq Qarabağ münaqişəsi başlandığı zaman könüllü olaraq Milli Orduda xidmət edib, Qarabağ müharibəsi veteranıdır.

Əmək fəaliyyəti dövründə Azərbaycan İdman Jurnalistləri Assosiyasında (AİJA) müxtəlif vəzifələrdə işləyib, hazırda ictimai əsaslarla qurumun baş katibidir. Paralel olaraq, 2000-ci ildən 2012-ci ilədək “Lider” Televiziyasında şərhçilər qrupunun rəhbəri, televizyanın baş idman şərhçisi olub. 2012 –ci ildən 2015-ci ilədək “Baku Post” qəzetində şöbə müdiri, ardınca qəzetin Azərbaycan dili bölməsinin redaktoru işləyib. 2015-ci ildən 2019-cu ilədək “CBC Sport” telekanalının İnformasiya xidmətinin şef redaktoru kimi çalışıb.

1997-ci ildə “Gümüş qələm” mükafatına, 2011- ci ildə “Azərbaycanda İlin İdman Jurnalisti” adına layiq görülüb.

Ailəlidir, üç övladı var.
ADIGÖZƏLOV FİKRƏT İLYAS OĞLU

1961-ci il mayın 10-da Ermənistanın Allahverdi rayonunda anadan olub. 1978-ci ildə Bakıdakı 126 saylı orta məktəbi, 1983-cü ildə Bakı Dövlət Universitetinin jurnalistika fakültəsini fərqlənmə diplomu ilə bitirib.
Hələ tələbəlik illərində Azərbaycan Radiosunda gənclik mövzusunda verilişlər, informasiya proqramları hazırlayıb, habelə respublikanın kütləvi informasiya vasitələrində (“Bakı”, ”Azərbaycan gəncləri”, ”İdman”, ”Kommunist” - indiki “Xalq” və s. qəzetlərdə) müxtəlif mövzularda məqalələr yazıb.

1983-cü ildə Azərbaycan Dövlət Teleradio Verilişləri komitəsində (indiki “Azərbaycan Televiziya və Radio Verilişləri” QSC) idman proqramları baş redaksiyasında kiçik redaktor kimi əmək fəaliyyətinə başlayıb. İşlədiyi dövr ərzində redaktor, böyük redaktor, şöbə müdiri, şərhçi və baş redaktor vəzifələrinə yüksəlib. Dəfələrlə müxtəlif rəy sorğularında ilin ən yaxşı idman jurnalistləri siyahısına daxil edilib.

2006-cı ildə Azərbaycan Respublikasının Prezidentinin fərmanı ilə respublikanın əməkdar jurnalisti fəxri adına layiq görülüb.

2007-ci ildə Azərbaycan Jurnalistlər Birliyinin “Qızıl qələm” mükafatı ilə təltif olunub. Dağlıq Qarabağ münaqişəsi zamanı dəfələrlə cəbhə bölgələrində ezamiyyətdə olub, ordu həyatı haqqında, hərbi xidmətdə olan idmançılar barədə süjet,reportaj və proqramlar hazırlayıb. Qarabağ müharibəsi veteranıdır. Jurnalist fəaliyyəti dövründə dünyanın 50-dək ölkəsində (Türkiyə, ABŞ, İspaniya, İngiltərə, Almaniya, İtaliya, Finlandiya, İsrail, Kipr, Yaponiya, Çexiya, Danimarka, İran, Polşa və s.) Azərbaycan idmançılarının iştirakı ilə keçirilən mötəbər turnirlərdən reportaj və proqramlar hazırlayıb.

2008-ci ildə Pekin, 2012-ci ildə London paralimpiya oyunlarından, habelə 2016-cı ildə Rio-de-Janeyro Yay Olimpiya Oyunlarından, eləcə də Bakı-2015 və Minsk-2019 Avropa Oyunlarından kütləvi proqramlar, Azərbaycan idmançılarının çıxışları barədə süjetlər hazırlayıb, canlı bağlantılar yaradıb.

Bakıda keçirilən irimiqyaslı yarışlar, dünya və Avropa çempionatlarından Rusiyanın “NTV-sport” telekanalı üçün müsahibələr, süjetlərin müəllifidir. Hazırda Azərbaycan Teleradio Verilişləri QSC-nın "İdman TV" kanalının baş redaktoru kimi fəaliyyətini davam etdirir.

Ailəlidir. İki övladı, iki nəvəsi var.